Joh 7 | KYG | STEP | Mago afina'mo utege'apae'mo Yu vaya'mogi Yesu'mo kamiti amagigune, hu'a hu'naya'mofe'mo Yutiya kotegamo umenitata osuno Galeliya kotegage'mo umenitata hu'niye.

John 7

Yesu agana'amogimo ge ha pai'naya gemae

1 Mago afina'mo utege'apae'mo Yu vaya'mogi Yesu'mo kamiti amagigune, hu'a hu'naya'mofe'mo Yutiya kotegamo umenitata osuno Galeliya kotegage'mo umenitata hu'niye. 2 Yu vaya'mogi hoyalega nopi'mo ne'maiya hopa afina'mo ago eno hogo hu'nige'apae'mo 3 Yesu agana'amogi, Gekamo ne'afiya vaya'mogi ali'yakamo agesayafe'mo mani kote'mo ataleka Yutiya kotegamo uvo. 4 Mago vekamo'a muki vaya'mogimo ali'ya'amo agesayafe'mo hau'nigeno'ae'mo fala kino no'maifa afole yateke'mo mai'neno ali'ya'mo ne'aliye, hu'a ha pai'nae. 5 Agana'amogi'e'mo agaefe'mo apakesa afi'a fatago osu'naya'mofe'mae. 6 Yesu'a, nagae afina'mo hemenimo afole o'ai'niye. Lapakae afina'mo muki afina'amo hane'niye. 7 Ma mopafi vaya'mogimo lapakaefe'mo afa'a alagi apaini hu'a olapategae. Nagaemo hosu kava'apie'mo gemo ae'na hakalo hu'na hapa nepauva'mofe'mo apaini hu'a ne'natae. 8 Lapakaemo hopa afina'moge'a ali'a anupa hu'a maisayategamo viyo. Hemenimo nagae afina'mo alagi afole o'ai'niya'mofe'mo o'uguve, huno hapa paiteno Galeliya kotegamo mai'niye.

Yesu'mo hopa afina'mo ali'a anupa hu'a mai'nayategamo uno mai'niya gemae

10 Agana'amogi hopa afina'mo ali'a anupa hu'a mai'nayategamo utageno'ae'mo Yesu'a afole kateti'mo o'u'nifa kesi kateti'mo u'niye. 11 Yu vaya'mogi kahauya hu'nayana o'age'apae'mo, ani vekamo haiyate'mo mai'niye, hu'a apafi ge'nae. 12 Muki asole vaya'mogimo agaefe'mo sumi sumi gefati'mo ge huge afige hu'apae'mo, alagepa vekamae, hu'a huge, ha'ao, vaya'ai apakesamo nefaiya vekamo mai'niye, hu'a huge hu'a mai'nae. 13 Yu vaya'aife'mo koli hu'naya'mofe'mo vaya'ai apaulagale'mo agaefe'mo ava gemo osu'nae. 14 Hopa afinapati'mo eno folaga hu'niya afina'mo Yesu'a Yu vaya'ai alopa mono nopi'mo haino aepa faino alino apaya male'niye. 15 Yu vaya'mogimo afi'a hapau aite'apae'mo, ani vekamo sukulu osu'niyana haiya kava huno Goti mukufi gemo ageteno nehiye, hu'a hu'nae. 16 Yesu'a, ali'na apaya ne'malova gemo nagai'ni gemo ohane'nifa Goti'a alino nate'nige'na emine'nova vekamo ge'amo hane'niye. 17 Ina lagimo Goti'a hau'niya kava'mo hisayafe'mo hapau'nisifige'na ali'na apaya ne'malova gee'mo hu'apae'mo Gotitegati'mo e'nifi agai'a aipafati'mo nehifi hu'a afa'a afigae. 18 Mago vekamo'a agai'a aipafati'mo ge nehisiyana agai'a agi'ale'mo ali'a asaga hu'a atesayafe'mo ha'ye hu'nigeno kahauya nehiye. Mago vekamo'a alino ate'nigeno emine'niya vekamo agi'ale'mo ali'a asaga hu'a atesayafe'mo hau'nisiyana lama ge vekamo mai'nigeno aigofe gemo aipafi'mo alagi ohane'niye. 19 Mosese'a ke'aepa gemo ago alino lapami'niya'monanafa lapakaepati'mo magoke vekamo'a ani gemo alagi akame osu'niye. Na kava hu'nogetapae'mo kamiti namagisayafe'mo nehae, huno apafi ge'nige'apae'mo 20 muki asole vaya'mogimo, kaipafi'mo hosu aune vekamo mai'niye. Ina la'mo kamagisiyafe'mo nehiye, hu'a afi ge'nageno'ae'mo, 21 nagaemo magoke ali'ya'mo ali'nogetapa agetetapae'mo muki vaya'amogitapamo ageta lapau ai'nae. 22 Mosese'a, ve mafa'netapimogi apakufamo lagautapa ataleyo, huno lapa pai'niye. Mosese'a ani kava'mo alino aepa ofai'nifa lapakinago vaya'mogige'mo hogote'a ali'a aepa fai'nae. Mosese'a, apakufamo lagautapa ataleyo, huno lapa pai'niya'mofe'mo Sapati afina'mo mafa'ne anaga'ai apakufamo lagautapa ne'atalae. 23 Lapakaemo Mosese ke'aepa gemo amagitapa o'atalesayafe'mo mafa'ne anaga'ai apakufamo lagautapa ne'atalae. Sapati afina'mo apakufamo lagautapa ne'atalaya'monanafa nagaemo Sapati afina'mo mago vekamo muki agufa'amo alagi ali'na alagepa hu'na ate'nova'mofe'mo na kava higetapae'mo lapaipamo letapa ne'natae. 24 Amega apakufa'aleke'mo apaketetapa alita fako osutapa apaketa alagepa hutetapaeke'mo alita fako hiyo.

Ani vekamo Kalaisi ne'mo mai'nifiye, hu'a hu'naya gemae

25 Mago Yulusalemu taonifi'mo mai'naya vaya'mogi, ani vekamo kamiti amagigune, hu'a vege hu'naya vekamo mai'nifiye. 26 Ageyo, hu'a, agaemo afole yate'mo mai'neno'ae'mo gemo aeno hakalo huno hapa nepaige'apae'mo ge nosae. Mesaiya vekamo mai'niye, hu'a age'nafiye. 27 Hiya'monanafa Mesaiya vekamo esige'apae'mo haiya kotegati'mo e'nifi hu'a afa'a o'agegaya'monanafa muki vaya'amogita ani vekamo e'niya ko'amo ago age'none, hu'a hu'nae. 28 Yesu'a alopa mono nopi'mo alino apaya ne'maleno'ae'mo alopa gefati'mo hapa paino'ae'mo, nagetetapa e'nova ko'mo ago age'nafiye. Nagai'nimo nagesa afite'na o'me'nofa alino nate'nige'na e'nova vekamo lama ge'age'mo nehiya vekamo lapakaemo alagi o'age'nae. 29 Agaemo alino nate'nige'na agaetegati'mo emi'ne'nova'mofe'mo age'nove, huno hapa pai'nige'apae'mo 30 atafau'a kalavusi hu'a atesayafe'mo hu'naya'monanafa agae afina'mo afole o'ai'niya'mofe'mo mago vekamo'a atafausiya ka'mo ohane'niye. 31 Asole ve a'nemogimo agaefe'mo apakesa afi'a fatago nehu'apae'mo, Mesaiya vekamo eno'ae'mo mago'e huno no'agona agufa aune kava'mo huteno ani vekamo aeno agasegaifiye, hu'a hu'nae.

Ati vaya'mogimo kalavusi hu'a atesayafe'mo hu'naya gemae

32 Ani agufa gemo hute'a sumi sumi gefati'mo nehage'apae'mo Falasi mono vaya'mogimo afi'nae. Afite'apae'mo apakae'e mono hu'a ne'apataya vaya'aite'mo yagai'a ne'apataya vaya'mogi'e'mo ati vaya'mogi kalavusi hu'a atesayafe'mo ali'a apate'nage'a u'nae.

33 Yesu'a, nagaemo lapakae'e'mo aise afina'mo maite'na alino nate'nige'na emine'nova vekalegamo halate u'na haiguve. 34 Kahauya hutapa nagesayafe'mo kahauya hugaya'monanafa o'nagegae. Hai'na maisuva kote'mo afa'a utapa ohaigae, huno hapa pai'nige'apae'mo 35 Yu vaya'mogi apakai'apimo, haiya kotegamo visiyafe huno'ae'mo kahauya hutapa o'nagegae, huno nehiye. Agaemo vayatimo atagu fae'a u'a Galiki nofi vaya'e'mo lokae'a mai'naya kotegamo uno alino apaya malesiyafe'mo nehifiye. 36 Agaemo, kahauya hutapa nagesayafe'mo hugaya'monanafa kahauya hutapa o'nagegae. Hai'na maisuva kotegamo afa'a utapa ohaigae, huno hu'niya gemo aepa'amo na agufa gemo hu'niye, hu'a hute'a ge huge afige hu'a mai'nae.

Afa'a maisaya ya'mo alino ne'apamiya anife'mo hu'niya gemae

37 Hopa afina'mo eno hano hugefe'mo hu'niya afina'mo henaga'amo alopa afina'mo afole ai'nigeno'ae'mo Yesu'a he tino alopa gefati'mo hapa paino'ae'mo, mago vekamo'a anife'mo hau'nisiyana nagaetegati'mo eno ani'mo neno. 38 Nagaefe'mo apakesa afi'a fatago nehaya vaya'ai apaipafati'mo alopa ani'mo afa'a maisaya ya'mo alino ne'apamiya ani'mo'a havai teteno aino vali lamigiye, huno aeno hakalo huno hapa pai'niye. 39 Yesu'a Goti Auneme'amo agaefe'mo apakesa afi'a fatago nehaya vaya'mogi alisaya Auneme'ae'mo ava gemo huno hapa pai'niye. Ani afina'mo Yesu'a he tino koku'napi'mo haino ha le konali ya'amo o'ali'niya'mofe'mo Goti Auneme'amo emi no'me'niya afina'mae. 40 Asole vaya'mogi ani gemo afite'apae'mo, lama ge nehune, Gotitegati gemo alinineno aeno hakalo huno hapa nepaiya vekamo egaiye, hu'a hu'naya vekamo ani vekamae, hu'a hu'nae. 41 Mago vaya'amogi, Mesaiya vekamo mai'niye, hu'a hu'nage'apae'mo mago vaya'amogi, ha'ao, Mesaiya vekamo Galeliya kotegati'mo o'megaiye. 42 Goti mukufi'mo avo'mo kae male'niya gemo'a, Mesaiya vekamo yagaino ne'apateya kini vekamo Nevini vayapati vekamo mai'neno Metelehamu taonifi'mo Nevini'a mai'niya taonifatike'mo afole aigiye, huno hu'niye, hu'a hu'nae. 43 Ani gemo hute'a ali'a fako hu'a apaote apaote hu'a mai'nae. 44 Mago vaya'mogi, atafaugune, hu'a hu'naya'monanafa magoke vekamo'a o'atafau'niye.

Yu vaya'ai monote'mo yagai'a ne'apataya vaya'mogi apakesa afi'a fatago osu'naya gemae

45 Ati vaya'mo halate atagi ne'a e'nage'apae'mo mono hu'a ne'apataya vaya'aite'mo yagai'a ne'apataya vaya'e Falasi mono vaya'mogi'e'mo, na kava higetapae'mo avalelitapa o'me'nae, hu'a apafi ge'nage'apae'mo, 46 ani vekamo aeto agufa gemo nehiya agufa gemo muki vaya'mogimo nosae, hu'a hapa pai'nage'apae'mo 47 Falasi vaya'mogi, lapakae'e'mo lapakesa fai'nifiye. 48 Monote'mo yagai'a ne'apataya vayapati vaya'mogimofi Falasi mono vayapati vaya'mofi hu'a ge'amo ne'afigetapa apake'nafiye. 49 Lagaemo ge'amo no'afuna'monanafa afa vaya'mo ke'aepa gemo aepa'amo o'afi'naya hosu vaya'mo afi'nayanage'a alagi lageso hugae, hu'a hu'nae. 50 Mago Falasi vekamo apakae'e'mo magokepi lokaeno mai'niya vekamo'a hogoteno Yesutegamo u'niya vekamo Nikonimasi'a, 51 Lagaemo ke'aepa getimo akame hisunafe'mo fiku agoti huta atetetae'mo, hosu kava'mo hu'niye, huta osisuna agufa kava'mo hane'niye. Hogoteta avayafati'mo hisiya gemo afiteta nehiya kava'mo ageteta alita fako hisuna agufa kava'mo hane'niye, huno hapa pai'nige'apae'mo 52 Kagae'e Galeliya kotega vekamo mai'napiye. Goti mukufi gemo'a huno'ae'mo, Gotitegati gemo alini e'a ae'a hakalo hu'a hapa nepaiya vaya'mogi hu'apae'mo, Galeliya kotegati'mo afole o'aigiye, hu'a hu'nagi kagaemo kahauya huka ageka lekana paika afiyo, hu'a ha paite'a 53 atale'a no'apilegamo u'e'a hu'nae.